Беларускі ўрад на тры месяцы ўвёў ліцэнзаванне вывазу бульбы за мяжу. Адпаведную пастанову падпісаў прэм'ер-міністр Беларусі Раман Галоўчанка.
Мэта ліцэнзавання – забеспячэнне ў поўным аб'ёме ў міжсезонны перыяд унутранага рынку сельскагаспадарчай прадукцыяй. Ліцэнзіі на вываз будзе выдаваць МАРГ на падставе ўзгаднення з Мінсельгасхарчам, аблвыканкамамі і Менскім гарвыканкамам.
Пастанова аб магчымасці выдачы такой ліцэнзіі будзе прымацца, зыходзячы з ацэнкі суадносінаў свабодных рэсурсаў бульбы ў Беларусі і патрэбы краіны ў ёй на момант узгаднення ліцэнзіі.
У лютым 2022 года ў Беларусі ўводзіліся ліцэнзіі на вываз цыбулі, капусты і яблыкаў, у снежні 2023-га – толькі на цыбулю і яблыкі. У жніўні 2024 года пад ліцэнзаванне трапілі таматы на перыяд з 1 лістапада 2024 года да 2 сакавіка 2025-га.
Сёлетні ўраджай бульбы ў Беларусі – каля 900 тысяч тонаў. Гэта менш, чым у 2023 годзе, калі было сабрана больш за 1 мільён тонаў. Ураджайнасць склала 306 цэнтнераў з гектара (у 2023 годзе – 359 цэнтнераў).
У лістападзе намеснік прэм’ер-міністра Юрый Шулейка казаў, што на экспарт плануецца адправіць каля 300 тысяч тонаў бульбы.
Надоечы «BELPOL» паведамляў, што ў распараджэнні арганізацыі апынуліся дакументы, якія сведчаць пра тое, што ў беларускіх крамах не хапае гародніны.
,,«Няма нічога – і гэта не дзесьці ў пачатку ці сярэдзіне вясны. Гэта цяпер. Гэта дакументы за восень 2024 года. Сітуацыя ўвогуле жахлівая», – каментаваў прадстаўнік «BELPOL» Уладзімір Жыгар.
Запасаў бульбы на складах – на два дні, капусты – на дзень, морквы – на 6 дзён. З такімі скаргамі скіроўвала ліст у Міністэрства гандлю гандлёвая сетка «Санта».
Іншая гандлёвая сетка – «Грын» – паведамляла: айчынных яблыкаў на іх складах увогуле няма. Складана і з іншай гароднінаю: бульбаю крама забяспечаная толькі на 30 % ад штомесячных патрэбаў. Рэтэйлер адзначаў: агульны аб’ём паставак беларускай гародніны цягам года абрынуўся з 80 да 12 %.
Дзяржаўныя сельгаспрадпрыемствы кампенсаваць недахопу не могуць – ураджайнасць не дазваляе. Закрытыя дакументы Белстату сведчаць: сёлета ў Віцебскай вобласці з гектара сабралі бульбы на 97 цэнтнераў менш, чым летась. Амаль на 40 % зменшыўся збор гэтых караняплодаў у Гарадзенскай вобласці. Адначасова цягам года пастаўкі бульбы з Расеі ў нашую краіну павялічыліся на 26,78 % – са 188 тысяч тонаў да 238 тысяч тонаў.
Марыя Міхалевіч belsat.eu
